燒喜 (已結業)

大家黎到天后，除左谂起维园大球场外，仲会谂起咩呢？自从今日以后，小编就会谂起系施弼街既一间串烧店—「烧喜」。首先系因为店内嘅环境都几舒适，店面虽则唔算大，但座位都算阔落，感觉系特别适合同好朋友倾下计，慢慢食嘅休闲串烧店咁，而且老板都几亲切，所以小编印象都特别深刻。除此之外，店内嘅食品都几吸引，特别系串鸡皮，鸡翼烧同京葱牛肋粒。先讲「鸡皮」啦，鸡皮炸得好松脆可口，调教味道都适中，价钱亦合理，小编觉得可以再食多次，但缺点就系鸡皮串埋一齐太薄，进食方面就比较难啲。其次就系「鸡翼烧」，老板事先将鸡翼一分为二，方便客人进食，呢个细心行为的确抵赞，而且味道唔错，虽然只系用盐黎腌制，但亦都唔会盖过原先嘅肉味，反而将鸡翼嘅味道更加带出黎，所以小编诚意推介俾大家，希望大家可以黎试下。最后系「京葱牛肋粒」喇，牛肋粒同样都系用盐腌制嘅，仲配上甜甜地嘅酱汁上面，同时老板都再次好用心咁将牛肋粒嘅边烧到脆口，当夹起牛肋粒再连埋爽口嘅京葱一齐食嘅时候，仲可以加添多一份清爽甜嘅层次感，将肉味更加升华。总结而言，小编认为要求唔高嘅人，都可以黎呢间小店一试嘅，除左试呢度嘅食物，最重要仲可以一尝呢度亲切嘅人情味添。