平發潮洲館

营业中

休息中

食完个西班牙菜开胃之后，我哋黎到平发食潮州菜！虽然话已经食左少少野，但系我地都依然叫到一枱都系野食呀！食潮州野当然唔少得食卤水，我哋叫左个双拼，生肠拼墨鱼。生肠好爽脆呀，点埋个醋，又几好味㖞，更加醒胃。墨鱼都唔错，唔会好韧，卤得啱啱好！豆卜大豆芽菜都好食呀，d芽菜吸晒d汁，唔会好草青味，豆卜就唔洗讲啦，吸晒d精华，正！至于汤呢，就唔少得胡椒猪肚汤！个汤好香咸菜味，再配有胡椒，猪肚同猪肠亦洗得好干净，完全无猪臭味，好好饮呀！朋友大力推介蚝仔汤米粉，真系无介绍错。份量大唔在讲，米粉面头舖满晒肥美嘅蚝仔，净系个卖相都已经相当吸引。蚝仔的确新鲜，而且无沙，配埋个汤同米粉，令人食唔停口呀！最后又点少得蚝仔煎饼，我哋叫左一个大嘅，有成四块咁多！蚝仔又多又肥美，有少少五香粉，唔点鱼露都已经好好食。点少少加少少咸味，又系唔错嘅。依度份量整体都算大嘅，好啱一大班朋友嚟食，我哋都食得非常尽兴！