火鍋撚 (日富里百好大廈) (已結業)

笔者好钟意食台式火锅锅底嘅鸭血同豆腐，见到火锅撚星期一至四可以无限追加，就即刻book枱去试。今次试嘅系西环分店，座位阔落，长卡位就算嗌多啲嘢食都摆得落。汤底向店员落单，食物饮品就自己qr code落单，好方便。叫咗半份细嘅安格斯牛肉，肉质好腍，但最初期望系𠮶个晾衫架嘅摆盘，原来要嗌一份先有，下次识嗌喇🥲即炸响铃几高质，有牌仔写明渌三秒就够，听佢话渌三秒就上嚟点个酸甜酱，果然好食～手工丸类叫咗拼盘同半份龙虾汤牛丸，但好似嚟咗黑松露牛丸，爆出嚟嘅汤汁似黑松露蘑菇汤，都几好食，其他丸类同海鲜滑都不过不失，好弹牙。蔬菜类叫咗个综合篮同埋半份紫淮山，综合篮嘅款式就大路野：粟米、娃娃菜、菜心苗等，有大大块黑木耳几爽口；紫淮山反而几有惊喜，腍腍地似紫薯但又冇咁滞。呢度仲有甜品送，可以拣仙草芋圆或者腐竹糖水沙冰，食到咁饱我就拣咗沙冰，用咗古代高脚杯装住，卖相讨好，味道亦都几清甜。