海灣茶居

营业中

休息中

平时返工都会经过大角咀呢间海湾茶居 ，餐厅环境宽敞，落地透明玻璃旁边设有好多卡位，一边叹茶一边欣赏下街景，比起传统酒楼，多咗一份雅致舒适，趁住放假约埋朋友去试下佢哋嘅下午茶。点心有好多款式，即制即蒸，全日免收加一，咁就可以嗌多几个点心啦 。一人鸳鸯蒸饭铺满鲜虾，鱼肉的米饭，放喺铺咗荷叶嘅蒸笼里面，光睇卖相已经好吸引呀， 虾，鱼肉都好鲜甜，配合埋饭食一流 。潮州粉果晶莹嘅粉皮包住好多马蹄，肉碎，食落好清新。煎酿茄子茄子新鲜炸起，圆润、饱满、有光泽，沾上豉汁， 好惹味。 牛肉烧卖牛肉好鲜嫩，咬落仲好弹牙，比起酒楼嘅牛肉球好食得多。鲜竹卷热辣辣腐皮包住丰富嘅馅料，味道鲜甜。最后仲嗌咗我最钟意食嘅双皮奶，桂花糕，糖不甩，可能系因为即叫即蒸嘅关系啦， 所有甜品都好好食， 糖不甩仲超弹牙。