文華餅店

营业中

休息中

眼见限聚令续步放宽，大食会为三位长辈庆生专登豪啲，拣咗去高级酒店食府「文华厅」晚膳，生日蛋糕顺便喺同酒店间「文华饼店」订埋，方便之余仲可以悭返$270切饼费，嘻嘻，XO仔系咪好精明呢？！西饼店位于酒店阁楼层，前方为咖啡厅，中央有棵金色嘅铁树，设计独特有风格，色调仲衬埋刚刚踏入嘅秋季，甚有诗意！收银处嘅透明玻璃雪柜内陈列出多款精美嘅件装西饼。小肥早就同契妹商量好要订文华闻名嘅招牌芝士蛋糕「1963 Mandarin Cheesecake」（$488），遇上年轻有礼嘅店员有效率，几分钟即搞掂。由于蛋糕安排直接送上酒店餐厅作为饭后甜品，所以唔系太清楚平时会点包装。圆圆嘅蛋糕厚薄适中，除咗芝士味芳香丰沛，每一口均可尝到质感细腻，厚润浓滑嘅芝士蛋糕，唔怪得知蛋糕名要刻意加上「1963」啦，因上网查证过此乃酒店创办之年份，经典蛋糕配方咪即系早过细佬出世？！始终传统芝士蛋糕比较溜，直径15cm嘅招牌蛋糕作为十二人饭后甜品份量刚刚好。中环名牌酒店嘅西饼舖「文华饼店」环境雅致有格调，服务优良，招牌芝士蛋糕「1963 Mandarin Cheesecake」散发出高贵嘅气质，实属传统芝士蛋糕之典范！