Nonsense

記得有次嚟土瓜灣想搵嘢食，見呢間餐廳好多好評想試下，可惜撞正休息冇開門，專登bookmark左訂埋位再嚟食。前菜叫咗黃金魷魚軟骨，炸得好脆口，鹹蛋黃味好香，簡直令人食唔停口。餐湯就正常，無咩驚喜。大啡菇同芝士不嬲都好夾，焗完好香，而且仲有沙律伴碟。嚟到主菜，環顧餐廳四週，幾乎係每台都有叫呢個招牌菜。 煲仔飯調味做得好好，飯有飯香而且焦脆。豬肋肉質感都好彈，配埋露荀，野菌，口感同味親都好豐富。豉油可以因應個人口味添加。本身想叫無糖可樂，但餐廳冇供應，於是揀飲熱情果烏龍茶，店員好細心提供少甜嘅option飲品嚟到，店員會噴玫瑰味香水，提供埋嗅覺方面嘅享受。飲品好Refreshing，少甜啱啱好，又有茶味雖然都食到好飽，但係點可以唔叫限量供應嘅甜品呢。我哋揀咗蝶豆花草莓卷蛋，卷蛋好香甜，好好味。本身想加雪糕，但店員提議我哋加配焦糖布丁，好彩我哋有聽，因為焦糖布丁都好好食。唔會超級甜，配埋脆脆焦糖面，一啖有齊軟硬口感。整晚餐廳員工嘅服務態度都好好，會介紹每道菜，非常親切。值得再嚟encore。