糖佰府 (已結業)

是日，去完九龙城食越南野，意犹未尽，谂住揾间糖水舖食下甜品。 行行下就见到糖佰府，谂起唐伯虎点秋香，见个名都几得意就入去试吓啦。 入面细细间，墙上面贴住好多明星黎食过嘅相片同埋食物嘅相片。 睇吓Menu，选择都几多，冷热都有得拣，价钱又唔贵㖞，都系30几至40几蚊一个甜品，所以一口气就试咗三样。 法式玉桂苹果批 $35即整热辣辣，未食已经觉得好香，苹果批脆卜卜，咬落松化，玉桂味香浓。 外层系酥皮，中间系一片片薄层嘅苹果，下面热上面冻，配搭曲奇味嘅雪糕好夹，唔会好甜。 芒果棉花冰 $40黎到好似一座山咁，棉花冰牛奶味好浓，入口即溶，食落去觉得好软滑 芒果唔酸好新鲜，芒果汁都好多，捞埋棉花冰好好吃。 无花果雪梨炖海底椰 $30热食，系咁冻天气下食呢个甜品真系觉得好滋润，饮落去觉得好香甜，食完驱赶晒所有寒意，喉咙亦都觉得好舒服。 呢度嘅甜品真系又平又高质素，老板娘招呼都好热情，值得试下。