豊勝手丼 (已搬遷) 新店位置

已经系第4次嚟食，次次都好满意，而且佢哋定期会加新菜色，值得隔一排又嚟食！北海蟹丼 ($198)卖相好吸引，钟意蟹嘅应该会开心到癫咗，有松叶蟹肉、2只松叶蟹脚、2只松叶蟹钳、味噌蟹膏及蟹籽。就算系蟹钳都已经整好晒，基本上唔洗出手都可以食到啖啖肉又唔会浪费半丝蟹肉！味道鲜甜而且口感系一梳梳咁，非常新鲜。花咗啲时间将全部捞埋一齐食，非常满足！五品丼 ($268)有三文鱼、油甘鱼、牡丹虾、活带子及日本海胆。全部刺身都好新鲜肥美，肉质甘甜；比较突出嘅系牡丹虾，超大只劲新鲜，肉质好嫩滑弹牙，食埋虾头入面啲膏，香甜无比！两块带子中间夹咗块柠檬片，必少少柠檬汁出嚟一齐食，鲜甜味道更突出；由于太肚饿嘅关系，啲日本饭香又绵密，所以一定要添饭！海胆系就系好香浓，不过叫多咗饭，如果海胆份量再多啲就完美啦，而家唔够捞晒啲饭呀哈哈！次次嚟都冇失望，春天又嚟食喇！