瀧宴日本料理

营业中

休息中

今日去咗銅鑼灣Sugar+瀧宴日本料理食鐵板燒，餐廳環境好靚，落地玻璃可以飽覽維多利亞公園嘅風景。首先食咗前菜先，有蘆筍，水雲，同日本蠔，味道都好開胃。跟住師傅就會擺放今日嘅食材出嚟，俾我哋影相，隻鮑魚超級新鮮，仲一直喺度郁緊。首先就食比目魚，外皮煎到極香脆。之後到大蝦，肉質彈牙鮮美，蝦頭惹味。鮑魚好大隻，口感好軟熟，係我鐵板燒食過最好食嘅鮑魚！帶子都好特別，同海帶湯一齊煮，上面有魚子，食落味道好夾。總括嚟講，依度海鮮嘅煮法都好俾心機，唔似平時單純用鹽同黑椒去煎。之後就到牛肉，有兩種煮法，一種係薄切牛肉包住蔥同蒜，另一種就係煎牛肉粒。我自己鍾意食牛肉粒多啲，比較有口感，都重牛味同油脂。已經食到好飽，但仲有櫻花蝦炒飯同蝦頭湯，炒飯好有鑊氣，櫻花蝦煎到好脆，蝦頭湯好惹味。之後仲有芽菜食。最後就係自家製嘅巨峰葡萄啫喱，可以解解鐵板燒嘅油膩。滿足嘅一餐。