叉燒大王

营业中

休息中

记得早几年兴捉精灵，我同太座都当时非常疯狂，会揸车四围去玩，有次去到河畔花园呢度，晚饭就入咗去叉烧大王度食，记得当时非常失望，今次系嚟附近揾嘢食，见装修过同扩充咗咁，一于再试过，入去见都几满座，刚刚有一张枱，好彩唔使等，坐低转头已经有几枱客喺门口等位；嚟到当然系要食叉烧，叫侍应整碟靓D淋D嘅俾比卡猪，佢最钟意食叉烧，睇吓张单真系会写住肥、靓D、淋D，食一旧简直刮目相看，真系好味，如果我自己食一定要求有小小㶶，不过比卡猪一齐食就唔好喇，佢都食咗一碗饭，可想而知旧叉烧几得；蒜蓉蒸开边海中虾，可以话系我近年喺街食得最好味嘅一次，蒜蓉份量刚好，海虾非常新鲜唔会梅，要同太座争食，金银蛋浸豆苗，蔬菜都系不时不食，豆苗虽然而家四季都有，但冬天仍然系当造，好明显呢度个货源拣过，今年食得最靓嘅豆苗；睇餐牌呢度仲有好多特色小菜，我见到有铁板爆田鸡，下次我一定要食呢个!