龍亭

之前食过佐敦𠮶间，觉得几有水准。今次见佢开咗分店，就试吓佢中环店，环境几宽敞空间感亦都好足够。今次叫咗厨师发板套餐，师傅烧之前会同我哋介绍一次啲食材，望到啲海鲜已经好开心。前菜加招牌沙律系佢哋嘅特色菜式之一，烟三文鱼配蔬菜口感层次一流，之后配埋个龙珠果解下个味蕾。刺身一品生蚝好新鲜，食落去有好浓烈嘅海水味同埋好Creamy，再配埋佢个蝶豆花泡沫，满足埋视觉嘅享受。个海胆配蛋食落去劲滑，劲夹同埋劲好味，系我其中一样最钟意食嘅菜式。元贝烧得到啱啱好，咬落去好有质感同埋好Creamy。鲍鱼亦烧得恰到好处配埋个蒜蓉真系好夹。白鳗真系值得一赞，外皮烧得好脆同埋充满鱼油，真系烧到外脆内软，烧白鳝真系冇得输，食过一定会话正。虎虾亦系另一样必食嘅海鲜，只虎虾烧完之后都好大只，咬落去系好实净，要食材好新鲜先做到。澳洲牛柳粒五成熟，师傅铁板真系有一手，烧到啲食材啱啱好，最紧要咬落去冇筋好好味。黑松露海鲜炒饭，食埋呢个真系好饱，我最钟意啲炒饭炒得干身一粒粒层次分明，呢度嘅师傅完全满足到我。饮埋个菊花豆腐白面豉汤暖一暖个胃，真系劲满足。食埋佢个红豆爆珠雪糕，个爆珠都几得意。