班蘭葉印尼餐廳

营业中

休息中

最近食得越菜泰菜多有點悶，朋友帶我去食印尼野。印象中印尼菜污污黑黑比較油膩唔多啱食，今次一試確係對它完全改觀，印尼菜絕對可媲美越菜泰菜。小店細細勁多食客等位，更有不少印尼人幫襯，感覺十分地道正宗。環境一般尚算乾淨，座位空間有限，枱仔細細放三碟野差唔多無位，難得待應收碟勤快一眼關七，欣賞店長用心推介美食。美食質素高，價值經濟貼地，CP值高，一定忍唔住再來番兜。班蘭雞尖塔飯 $68綠色尖塔飯好吸睛下，飯粒粒分明充滿班蘭獨特清香。雞肉嫩滑冇骨啖啖肉有雞味，旁邊有堆韭菜炒麵醬汁味濃，炒得非常好食。印尼秘製汁燒魷魚 $128原條大魷魚望見開心，口感軟彈，醮埋醬汁更加美味，一款青檸少辣甜美，另一款似冬蔭功酸辣刺激，各有特式。沙爹串燒拼盤 $188串燒雞、牛、羊、白鱔各兩串，串燒入味就咁都好好食，醮埋沙爹醬汁更加惹味。牛肉和雞肉都好嫩多汁，羊肉軟嫩無羶味，白鱔肥美爽口大大串啖啖肉感好滿足。珍多冰 $28大大杯好多珍多，啖啖椰香椰糖適量甜度適中，作為消暑飲品，正呀。印尼咖啡涼粉冰 $30涼粉切得好幼條，用飲管輕易啜到非常方便，口感爽爽，咖啡味香濃甘甜好飲。