古今二 (荃新天地)

营业中

休息中

同朋友喺荃湾行街行到攰，朋友提议过嚟呢间佢最钟意嘅卷物店医下肚。卷物选择非常多，充满新鲜感嘅配搭加上玩味十足嘅名字，令人霎时间有啲选择困难。因为朋友对牛油果敏感，最后我哋拣咗金龙卷同烟花。金龙卷一客八件，三文鱼同炸虾配上芝士，算系美味又稳阵嘅配搭，鲜甜嫩滑嘅三文鱼配上脆卜卜啖啖肉嘅新鲜炸虾，加上味道浓郁嘅芝士同日式酱汁，令人满足。烟花用上味道微辣嘅三文鱼同呑拿鱼，加埋脆片同蟹籽做点缀，无论口感同味道都带嚟新嘅冲击，充满新鲜感。烤茄子食得多，多数系较为重口味嘅大陆风味，估唔到日式风味亦出奇夹，茄子软腍多汁，加上咸香脆口嘅樱花虾令口感更丰富。盐烧鸡翼同鸡肾非常出色，鸡翼香口而唔油腻，鸡肾口感弹牙，简单调味更加能够带出食物本身嘅味道，非常推荐。