阿媽正宗海南鷄 (已結業)

今晚去红磡整嘢，顺便食个晚饭，行过宝其利街见到一间《阿妈正宗海南鸡》嘅小馆，作为一个海南鸡粉丝，梗要入去试吓喇。店舖面积唔算大，街坊小店格局，约莫有八九张细枱，地方都算干净企理。餐牌选择唔多，主打卖鸡饭，除咗海南鸡之外，仲有沙羗鸡、盐水鸡、口水鸡同葱油鸡，另外仲有猪扒饭同藕饼饭。我拣咗海南鸡脾饭(HK$49),例汤先上，真系好清嘅鸡汤，呷一口，咦! 有惊喜! 点解有药材味嘅，问侍应姐姐，原来佢哋落咗川芎、杞子同红枣嚟煲，唔怪之得喇。我个人就觉得几特别，几好味。跟住靓靓海南鸡脾饭上枱，呢个心形嘅鸡油饭认真盏鬼，饭入面加咗香茅都几香，不过就干身同硬咗一啲。好在啲海南鸡就几得，首先份量够足，件件皮薄嫩滑，配埋三式酱油，真系食得几滋味。我仲加多HK$12，叫多碟鸡汤浸菜苗，咁有肉有菜，就食得健康啦。今次试过呢度啲鸡真系有番咁上下，下次再嚟就会试吓唔同嘅炮制方式，睇吓滋味如何。