御名軒

营业中

休息中

放工约咗娘亲食个晚饭，由于佢讲咗好多次想食片皮鸭，于是揾咗间娘亲搭个叮叮就可能去到，位于天后嘅酒楼食片皮鸭。位置好方便，劲近天后地铁站，又多巴士到，又可以搭叮叮，非常适合家庭聚会，老人家都方便过去呀。京式片皮鸭(半只) $98————————————有得点半只份量实在太好啦！大概系2至4人份。鸭皮嘅部份都好香脆，啲油脂都好丰富，入口好香油脂味，用饼皮包住，加埋酱汁、京葱一啖入口，正呀👍🏼冰镇南非鲍鱼(每只) $58————————————处理得不错嘅冰镇鲍鱼，入口冇雪味，亦冇未融化嘅冰碎。冰镇后鲍鱼仍然有弹性，原来上菜时已将鲍鱼切成四小份，方便食用。酱汁都好特别，有芥末味，又几夹冰镇鲍鱼架㖞。胜瓜蒜蓉粉丝蒸带子 $108————————————个粉丝底劲香蒜蓉味呀！胜瓜蒸至淋身，够入味，带子又滑又大粒，好滋味！荔芋滑鸡煲 $108————————————芋头份量好多，煮到有点蓉蓉嘅感觉，个汁都好正，充满甜甜嘅芋头香，好Creamy，好送饭。吕宋芒果布甸 $28————————————最后食返个经典甜品😋细个去酒楼唔敢举手同屋企人讲想食芒果布甸，大个咗就可以啦🤣系童年嘅味道。