浮然

营业中

休息中

同同事去食lunch，门口有个职员拉客，见餐牌正常又未试过，就入去试吓啦。午餐系餐汤+意粉+嘢饮，手机落单。店内得一个职员煮嘢食，冇人招呼我哋，明白嘅，唔系Peak hour人手可能比较少。等咗20分钟（而我lunch break只有1个钟），餐汤嘢饮一直冇送过嚟，终于等到第一个意粉送嚟，佢至讲：「唔好意思冇餐汤，俾返个折你哋OK ？」喂大佬呀，拉我入嚟𠮶阵你唔讲？落完单你又唔讲？等咗20分钟个意粉送到嚟你至讲冇汤？咁即系焗我食你个意粉啫！而我得返30分钟食饭，想转场都唔得啦！好啦，照食。三文鱼意粉得几粒三文鱼碎，红酱虎虾意粉？就系茄膏捞意粉！冇调味，只有茄膏甜味，仲要干争争，我开包即食意粉酱都好食过佢🙄期间拉客𠮶个职员仲走入嚟不停讲粗口，完全无视客人（因为舖入边只有我哋两个，可能佢觉得我哋系钟意听粗口卦）唯一可以赞嘅系，木瓜鲜奶系真木瓜鲜榨的，可惜有啲淡，而柠乐佢都有榨柠檬汁入去再加两片柠檬。埋单即管睇吓你点收我哋钱啦，我哋估每人都应该减$10卦。哦～原来系9折，$10都冇，多谢晒。做生意做到咁唔老实，成个餐牌得意粉都可以煮得唔好食，啲职员又冇礼貌，冇人帮衬系有原因架啰。