籠太子點心專門店 (已結業)

上星期试左呢间话拍得住添好运点心嘅食肆，试后觉得非常一般，去过一次唔会有下次。 首先入到去环境狭窄， 唔够冷气，食到出汗。 不过啲嘢食嚟得颇快。鸡扎$26, 好细只 ，个鱼肚又幼又薄， 第一次食啲咁嘅鸡扎。 凤爪个颜色一般，味道ok，但系辣到食唔到。 虾饺超细粒，$14一粒，啲虾又唔爽。 腐皮卷薄到冇人有， 每条得一粒虾， 细到好似一毫子， 一开二，得一边有虾食。 牛肉拿粉味重，一啲都唔软熟。 虾胶酿茄子，卖相好靓， 上面粒虾胶细不特止， 煎到又干又硬， 仲话系推介，简直中伏。 仲有一款叫「不是炸两」， 系肠粉包住啲唔知咩炸嘢 ， 里面够炸嘢油林林又有啲苦。反而个烧卖几好食。最后想讲， 店内 24个座位坐满，全程得一个侍应， 落单出菜执枱埋单，一脚踢。之后各枱都出左餐，差唔多食完，有一位貌似老板嘅男人从厨房出嚟， 揿一揿个收银机望望， 跟住又入返去喇， 真系邓呢位侍应辛苦，而家d 老板真刻薄。