西香記 (已結業)

呢间陕西小店想试好耐，一路惊会好辣唔敢嚟，但后来听讲其实辣度好大众口味，于是今日就的起心肝嚟试下喇！叫咗套餐 B，拣咗炸酱 biang biang 面 （biang 系普通话拼音，广东话唔识读，字典查唔到，反正我就叫佢 「柄柄面」）、香辣海带丝同酸梅汤。同潮式云吞面舖𠮶啲炸酱面唔同，呢个炸酱 biang biang 面系凉拌嘅，而且一啲都唔辣。炸酱嘅猪肉碎炸到干哂，混合多种香料同酱料煮制而成，油香四溢，香浓惹味。而主食 biang biang 面就系好厚好濶好长嘅手工拉面，一碗面只有大约 2-3 条面，每条面有成掌心咁濶，厚度则大约有 2 毫米。所以，面质咬落去非常烟靭弹牙而且爽滑，嚼劲十足。而配料方面除咗有炸酱外，仲有爽脆嘅青瓜丝、腍腍地嘅甘笋、青豆粒同薯仔粒，夹埋一齐食丰富咗口感。不过，食咗几啖面嫌唔够刺激，于是夹咗几粒旁边香辣海带丝中嘅指天椒粒嚟食，辣辣地，更过瘾！食食下，不如就直情夹埋海带丝一齐食。海带丝酸酸辣辣又爽口，夹埋啲面一齐食酸辣爽滑劲开胃！（唔食得辣嘅朋友请放心，小辣嚟咋！）讲埋酸梅汤，酸甜度好够味，饮到底仲有啲沙沙嘅果蓉感觉，可见真材实料！