泰海鮮 (已結業)

就快过年，又系时候约食团年饭兼聚旧喇！朋友们住新界西多，今次就拣咗屯门三圣村大排档～～ 泰海鲜食团年饭。呢次系我第二次嚟呢度食，虽然佢叫泰海鲜，但我哋并无叫泰菜，反而都系以海鲜宴为主。你可以喺餐厅直接叫，又或者去附近海鲜档 （今次部份海鲜喺关财记买），拣生猛海鲜带入餐厅比师傅加工，无论系白灼／清蒸／豉椒炒／炆／蒜蓉蒸等等，总之你想点煮都得，明码实价列晒加工费几多。嚟呢度必点海鲜汤，用杂鱼、濑尿虾、沙白蚬、番茄薯仔去煲，用料丰富，味道劲鲜甜！不过记得要趁热饮先好饮呀！我对「泰皇芝心虾丸」念念不忘，以面包粒包住去炸，入面虾胶劲弹牙，再咬落去啲芝士流心咇出嚟，口感丰富，小心热呀！（一碟3粒，我哋再加钱)凤梨鲜排骨，酸甜惹味，送饭一流！呢碟系最快清晒，可想而知几受欢迎？青山湾焗芝士龙虾(3只开边)，每只都好大只，焗到金黄色，卖相吸引！你睇我用筷子笃入去，啲芝士几厚？咬落脆脆哋，肉质嫰滑，啖啖芝士咸香，食龙虾都饱饱哋 @@砵酒焗桶蚝，呢个系我哋买入嚟加工，师傅提议用砵酒焗嘅煮法 (加工费每细桶$62)，少少脆，肉质肥美，少少甜又有少少酒香，真系唔错㖞！呢次团年海鲜饭颇满足呢！