銓仔記

营业中

休息中

自从开心鸡煲执咗之后，就得返依间可以做到平价得嚟又有唔错嘅鸡煲+任食火锅享受。每次过嚟食我都系叫佢个奇味鸡煲。虽然唔知点解叫奇味，但系食过就一定返寻味。超香嘅洋葱配合花椒八角令人一边食一边流口水。同埋啲鸡都抄到入晒味。建议食少辣或者中辣，咁样先可以突出佢嘅香味。佢嘅鸡煲系即叫即炒，所以唔使担心会好似出面部分餐厅翻一翻热就拎出嚟。食完鸡煲入面啲鸡之后，就系时候加汤打边炉。基本上市面上打边炉嘅料佢都有。不过味道就一般般，啲肥牛太肥又冇咩味道，猪润唔太新鲜，猪嘅粉肠有时候好好味，有时候有阵怪味。所以我钟意食丸同埋菜，因为佢哋好难整得唔好食。饮品方面，基本上汽水𠮶啲都齐，但系冇谂过佢竟然有新版嘅无糖可乐。钟意饮酒嘅人士都有啤酒提供。钟意饮清淡啲嘅有苹果绿茶或者柑桔柠檬。总括嚟讲，呢个价钱有咁嘅质素非常满意。但系希望个环境可以干净少少。