金子半之助 (奧海城二期)

营业中

休息中

今晚去咗奥运揾朋友食饭，佢带咗我去金子半之助，话午餐时段成日好多人排队，所以好奇想试下。佢叫咗迷你天丼&稻庭乌冬餐，虽然叫迷你天丼，但配菜都有菇菌、海老、南瓜、海苔、荚碗豆、温泉蛋。我同朋友都好欣赏蔬菜嘅天妇罗，感觉冇咁邪恶又比较少食到。稻庭乌冬啱哂我朋友口味，味道清淡加埋啲配料，口感十分弹牙爽口。正准备品尝之际，侍应突然放低一个木盒。原来餐厅仲提供加配料俾食客自由加入乌冬，分别有葱花、海藻、鲣鱼花、天妇罗碎同埋温泉蛋。我就叫咗松叶蟹天丼，套餐有渍物前菜，萝卜带有少少柚子味，加上生姜辣辣地，非常开胃。除咗松叶蟹肉之外，仲有海路、小柱鱿鱼天妇罗饼、荚豌豆、海苔同埋温泉蛋。蟹肉好饱满有蟹味，虾肉质结实，口感极佳。丼加了柚子皮，味道更加独特。温泉蛋外面煎香，入面流心，食到咁上下嘅时候，可以笃爆佢捞饭食，令到白饭更加湿润之余带有浓浓嘅蛋香。我哋追加咗穴子，味道同质感都同鳗鱼好相似，用炸嘅食法更为新鲜，点埋餐厅嘅秘制酱汁一齐食味道出奇地匹配，令整道菜的味道升华。餐厅仲提供黑豆茶，根据佢哋嘅描述，有补益止汗、滋补肾脏、保肝明目、滋润肌肤、抗衰老嘅功效， 亦都非常好饮。