新肥泉海鮮大排檔

营业中

休息中

见到有90分钟放题嘅大排档，梗系要嚟挑战一下食得几多！今次就试吓小炒+煲仔，食物喺即叫即整，但佢地好快手就煮好哂👍🏻仲一碟接一接咁上菜，所以每一碟都够哂热辣辣。见到全部食物都劲大碟，最终梗系挑战失败😬椒盐鸭舌鸭舌外层炸得非常酥脆，加埋椒盐炸蒜兜炒，够惹味！加埋碟鱼露，感觉仲冇咁热气。肥泉小炒王诚意十足，用料够丰富。配菜有黄红椒、鱿鱼、叉烧、虾干、菜脯外，表面仲有脆口银鱼仔、腰果。而且韮菜花入口爽嫩冇渣，火候控制得啱啱好👍🏻👍🏻猪润啫啫鲜鸡煲一上枱，「嗞嗞」声不断，非常吸引。猪润唔算大块厚身，但就算锅内继续高温加热，食落嘅口感绝对唔粗糙。鲜鸡件起码有半只鸡嘅份量。配搭厨房三宝「姜、葱、蒜」劲香浓，送饭一流！黑椒薯仔牛柳粒焦香味十足，薯仔炸过好香脆，牛柳走过油，唔会干柴，仲吸收哂黑椒蜜糖嘅味道。