麵家山下 (已結業)

我好中意食拉面，所以公司同屋企附近大大细细嘅拉面店基本都比我试过，最近听讲元朗有间拉面店叫面家山下嘅拉面好得，本嚟想等休息日先过去，但今日就忍唔住过去食喇，估唔到咁出名嘅拉面店咁细间，但装修都好用心，听讲老板娘系日本人，咁拉面应该会做得比较正宗喇。拉面有四五种，每款都相差唔多，就系配菜嘅多少问题，价钱贵就会多D配料，我点左个拉面DX，拣左黑蒜味，开始我仲有D担心黑蒜味会唔会太过浓，闻起嚟的确好浓，但入口又一D都唔觉得，反而会觉得有淡淡嘅蒜香味，有四块烧过嘅肥叉，肥瘦比例简直系黄金组合，叉烧两边又烧过，所以肥叉食起嚟觉得好香口，但又唔觉得肥同油。跟住就梗系要试下D面喇，好彩都无令人失望，而且仲觉得有D惊喜，面身好弹牙，好有韧劲。当然一碗好嘅拉面，比你嘅惊喜唔止咁少喇，笋片都会令你爱上呢度嘅拉面，我平时唔多钟意食都觉得D笋片好好味，好爽甜，比其他店食到嘅要好食好多，几十蚊一碗咁正宗嘅拉面，超值。