鉄皇子小賣所 (已搬遷) 新店位置

今日第一次试喺元朗呢间嘅铁板烧，印象中铁板烧都系比较中高价钱嘅餐厅，但出奇地呢间餐厅有平价铁板烧食同埋平时喺元朗屯门天水围都好少见到有铁板烧，所以今次特登去试吓。到咗餐厅之后见到餐牌大概50至$60就有一款菜式，我哋点咗牛肉丼饭、鳗鱼丼饭、炒鱿鱼、炒牛舌，仲要试埋特色饮品听讲老板系喺马来西亚𠮶边订返嚟。份量都几多，两个人食完全系好足够尤其系个炒鱿鱼好香口惹味，用黎配饭一流！钟意食鳗鱼嘅朋友都可以试吓，因为呢个鳗鱼丼饭嘅鳗鱼系成条上！！仲要经过铁板烧之后鳗鱼好香，劲好食！呢个丼饭只系$88，超级抵食。之后同老板开始倾偈，先知道原来本身餐厅系做中高价价钱，但系因为通咗关之后好多人都返咗大陆消费,所以转型做平价铁板烧吸引客人。佢话做咗15年都就嚟顶唔顺，听到都有啲心酸，所以希望大家都可以支持本地餐厅啦！