白鬍子炸魚薯條 (已結業)

每次去尖沙咀都會忍唔到過海前來到White Beard order炸魚薯條，坐係海邊食別有一番風味。今次例牌order 佢地嘅Signature Fish n Chip，質素一貫地好，鱈魚唔會一切就碎輯輯，炸份好薄，魚同粉亦都唔會分離，鹽花好均勻，每一啖都好香口。炸魷魚圈都好吸引，隻隻都好粗身，魷魚都新鮮無雪藏味，輕輕擠啲檸檬汁就好好食，而且$48份量都唔少，兩個人食岩岩好。佢地嘅他他醬真係咁多隻醬入面最好食，夠酸味，質地濃稠度啱啱好，無論同薯條，炸魚同其他海鮮都好夾。不過Mustard就有少少失望，味道偏甜，唔太夠芥辣，所以強烈建議兩個醬都揀晒他他最就好！（一個他他醬真係唔夠點haha！）Yuzu Honey 夠fresh唔太甜，始終食炸嘢要叫有汽飲品先正，下次order返啤酒比較好！呢間分店最好最好嘅bonus就係呢片維港景，坐係碼頭旁嘅梯級度食猶如置身外國，享受片刻寧靜。來過幾次蘇豪同碼頭分店，於我而言如果係下午時間，食個late lunch，蘇豪分店似乎適合啲，個邊個感覺再休閒啲；如果好似我咁evening時間或者放工未想返屋企住，呢邊吹下海風係一個唔錯嘅選擇！