Chalet (已結業)

见呢间餐厅正评颇多，即管就黎试一试呢度嘅晚餐。呢个餐厅装修好特别，一入去到就好似置身瑞士嘅小木屋中。餐厅灯光偏暗，好有情调，虽然有提供酒精饮品，但唔会好似一般酒吧咁嘈吵。叫了2个dinner set。前菜系帝王蟹饼配蛋黄芥末酱或者忌廉芝士茄子卷，我地拣左每样一款。是日餐汤系南瓜汤或者蘑菇汤，我地拣左蘑菇汤，主菜我地拣左法式纸包鲈鱼和黑松露牛肝菌意大利饭。前菜先上，摆盘好靓，手机先食后，我地就动手。蟹饼好脆，一丝丝蟹肉又唔会太干，略嫌有少少腥味，始终系海鲜，腥味在所难免。芝士茄子卷味道好特别，只系份量少了点，蟹饼抵食D。蘑菇汤闻落去非常香，味道非常浓，好重菇味，非常好味！赞！配以热辣辣脆面包，相得益彰。牛肝菌饭上的泡沬好特别，但其实系无乜味道。整个饭菇味好浓，尤其系牛肝菌，配以黑松露，大啡菇，味道非常浓郁，简直令我呢个爱菇之人爱不释手。另一个系纸包鲈鱼。打开纸包后，见到鲈鱼好大条，而且系鱼柳，无骨，啱晒我呢D懒人。法式嘅做法系带少少酸甜味，但鱼肉本身无乜鱼味，味道有点失望。甜品系哈蜜瓜布甸和面包布甸。哈蜜瓜布甸唔够滑，面包布甸就几好味。