Amitie Kitchen

营业中

休息中

尖沙咀其实有好多隐蔽餐厅，好多间好嘢都要上楼，如果唔系有人介绍都唔知有咁多间餐厅。今次呢间Amitie Kitchen就系朋友之前食过，经佢介绍之下就一齐嚟试试。跟午市套餐有碗是日例汤，今次系忌廉蘑菇汤，个汤非常creamy，但系又唔会好肥腻，蘑菇味亦都好浓郁。因为肚饿，嗌咗三款前菜，分别系「黑松露炸薯条」、「法式香草牛油焗田螺」同埋「炎焰加海胆焗松蟹膏大啡菇」。薯条比想像中大好多，热辣辣点埋只酱好正。田螺相对比较失色，如果香草味可以浓郁啲会更加好味。大啡菇虽然卖相麻麻地，但系材料好丰富，个海胆好鲜甜，整体口感几好。主菜有两款，「蒜片辣椒大虾意大利面配巴马火腿」同「牛肝菌意大利饭」，意粉蒜味好香，辣辣地好几开胃，一共有四只虾每只都弹牙，意大利饭味道好浓郁，捞埋上面啲芝士简直一流。整体而言餐厅食物水准几好，而且环境几适合一班朋友一齐，唯一扣分系等食物嘅时间比较长，除此之外都几好。