鰻工房

营业中

休息中

朋友知我钟意食鳗鱼，推介我去咗尖沙咀呢间鳗鱼专门店，果然冇介绍错！见到期间限定嘅沙罗鳗蛇丼，好奇之下即刻叫嚟试下。呢个特大size嘅丼饭真系够晒霸气，条鳗鱼仲大过盒饭，要另外再揾只碟装住，两个人分都够食有余。鳗鱼身好厚，而且肉质比平时嘅鳗鱼更加肥美，值得一赞嘅系餐厅烧得恰到好处，令鳗鱼边有少少焦香，绝对值得一试。惊我哋未够饱，餐厅仲喺鳗鱼下面仲铺满咗厚厚嘅玉子烧，食落去热辣辣又甜甜地，同鱼肉相得益彰，食到好满足。未知佢咁有份量之前，我哋仲叫咗个鳗鱼滑蛋丼套餐，套餐有前菜、鳗鱼干白贝汤同温泉蛋。滑蛋丼加咗冬菇，令口感更加丰富。白饭亦都加咗枝豆同埋紫菜，成个餐嘅用料都好讲究，而且非常丰富。最特别嘅系，餐厅提供二食，食到咁上下可以叫侍应加昆布高汤，混合芝麻同埋紫菜变成茶渍饭，性价比再大大提高。