YKK建榮

营业中

休息中

天气冻冻地，又唔想日日都系打边炉咁单调，所以想食烤鱼！我个屯门原居民友人，就带左我去呢间食！装修简单，但五脏俱全。客人大多系周围嘅熟客，浓浓嘅人情味。讲番野食，系主菜黎之前，嗌左个蒜泥白肉，满满嘅蒜蓉，加埋啲辣油，真系劲香。食完前菜，我个烤鱼就到啦，重庆麻辣烤鱼锅，有得嗌辣度嘅，细到bb辣都得，同友人今次嗌左个小辣。鱼骨系粗身嘅，冇乜幼骨，所以一夹就全部都系肉，唔会食到骨，岩晒我呢啲对鱼骨无能嘅人。值得一提嘅系，鱼锅本身都加左好多配料，豆腐，薯仔，宽粉等，呢啲配料煮到最后，系劲入味！必食！将鱼肉食得差唔多，就系时候加水，打打边炉。美国肥牛片，虽然系雪藏货，系难得地好重牛味，水准出色。深海带子片，份量劲大方，十几粒系度。虽然唔系话好吸汁，但最重要系食到佢本身嘅鲜甜味，而且煮耐都冇话好韧。包仔豆腐。以家香港真系好少地方可以食到包仔豆腐，虽然味道讲真唔多特别，但都值得食。娃娃菜。多到满泻，个篮都装唔晒。响铃。系即炸嘅，仲要比埋泰式辣酱，可以就咁点黎即食，都ok嘅，唔会好油。不过就唔太建议食完鱼锅嗌，因为只会浸满啲辣油。最后，呢啲咁地道嘅打边炉，当然要配返支碑酒啦。