樂天經典 (奧海城二期)

营业中

休息中

今晚同妈妈撑枱脚，系奥海城行完街就顺便揾间餐厅食晚饭。其实三期个边餐厅有好多选择，不过妈妈钟意食中菜，又想近返地铁站，就拣咗来乐天食饭。餐厅装修低调企理，座位之间好多空位，感觉开扬舒服。坐低之后我哋就开始研究餐牌，发现呢度啲中菜同平时嘅酒楼有啲唔一样，除咗有啲新潮嘅菜式之外，仲有啲南洋风味。而且呢度嘅食物可以叫大中细size，多人少人黎食都冇问题。由于选择好多，我哋都睇左好耐先决定到食乜嘢！先来一个头盘，蒜香红海蜇头。海蜇头非常爽脆，味道酸酸辣辣，醒神开胃。然后，见餐牌上面有一味招牌扣肉包，我哋就点左两件试吓。原来包同肉系分开上嘅，自己夹埋一齐。其实咁样仲好，扣肉嘅汁唔会整到个包湿哂。呢味果然系招牌菜，包系非常嘅松软，而扣肉亦炆得好腍好入味，最正嘅系餐厅安排左生菜夹入个包一齐食，感觉健康啲，又冇咁油腻。再来一味古早鱼香老鼠粉煲，呢个煲一拎上枱嘅时候味道已经好香，侍应仲拎住一碟小小嘅咸鱼碎，问我地要唔要捞埋落去，妈妈钟意咸鱼，即刻表示同意。捞左咸鱼肉，再搞下只蛋就食得。老鼠粉其实就系银针粉，口感滑溜，配上杰身嘅汤汁，同埋各样配料（咸鱼、虾仁、冬菇、蔬菜等等），味道丰富好食，妈妈赞不绝口。