漁釧 (V Walk)

营业中

休息中

南昌新商场V walk食店林立，不过高质嘅餐厅就唔算多，今日我哋两个人一齐去试吓新开嘅日式居酒屋，装修环境十分贴近日本当地嘅水准，令你似乎置身于日本一样。呢间舖头主打吞拿鱼，吞拿鱼相当新鲜，刺身切得好厚身，食落去呢就非常之香浓鲜甜。另外必试嘅桂花梅酒，饮落去一啲酒精嘅感觉都冇，好清新好易入口，有淡淡嘅桂花味，再加上酸酸嘅梅味，真系令人食指大动啊！吞拿鱼系列嘅寿司同埋沙律都非常新鲜，系好有水准嘅出品，令人继续有胃口去试吓其他嘅食物！由于系居酒屋嘅关系啊，好多嘢都比较咸，例如干烧鱿鱼一夜干，同埋炭烧鸡，呢两样嘢都系非常之好送酒嘅，推介俾钟意饮酒嘅你！至于清酒煮生蚝就好适合唔系好饮得但系又想尝试下清酒嘅人，清酒同蚝非常之夹，好清新，令你一啖一啖停唔到落嚟，而且饱满多汁。如果钟意一路食一路饮吓酒又同朋友倾吓计嘅你呢，非常建议你过嚟试吓，坐得舒服之余，又能够尝试下唔同嘅送酒菜式。