泰海鮮 (已結業)

今日约咗老友去屯门食海鲜。三圣邨听就听得多，但就从未嚟过，都唔知边间好食。朋友系识途老马，佢带咗我去泰海鲜，佢话呢间上次食过，做得唔错，今日约齐脚，再过嚟食多次。我地叫咗几个𩠌，有我的至爱酥炸生蚝，另外仲有辣酒煮花螺，白酒忌廉花甲乌冬底，油盐焗奄仔蟹…油盐焗奄仔蟹叫咗两只，每人有半只。半只好够喇，啲膏多到呢，张住个口，简直齿颊留香，正呀。酥炸生蚝啲蚝大大只，炸得又香又脆，唔会好油，只只都胀卜卜，肥嘟嘟， 蚝味十足，果然冇令我失望。白酒忌廉花甲乌冬底用白酒忌廉嚟煮花甲真系唔错㖞。啲花甲除咗鲜味之外，仲有阵阵白酒忌廉香。其实反而最惊喜就系啲乌冬，乌冬食落好弹牙，应该系贵价靓乌冬，再加埋白酒忌廉，同花甲啲咸鲜味落咗去乌冬到，啲乌冬转个头就畀人夹晒，一条不剩，大家果然识食。老友果然冇介绍错，泰海鲜性价比高。下个星期中秋可以带埋屋企人再入嚟食返餐。