Shine (已結業)

行开尖沙咀，同行朋友话带我食好野，难得一聚当然赏面啦。餐厅位置都唔难揾，系九龙公园附近。餐厅虽然唔大，但有情调得黎又静静地，岩晒倾计谈心。餐牌上既食物虽然款色唔多，但款款都好吸引。叫左小食拼盘，无谂过份量咁夸张。有鸡翼，炸洋葱圈，炸虾，炸鱿鱼圈，炸薯条共五种炸物，虽然炸野系热气，但热辣辣趣卜卜，又真系好难忍到口，每一种都好食，鱿鱼圈口感最特别，烟烟韧韧又趣口，赞！海胆好新鲜，食得出海水味好鲜甜，三文鱼籽粒粒都晶莹剔透，咬落去瞬间系咀入面爆开，充满鱼油既香味。而且意粉配明太子忌廉汁，香浓得黎又滑又creamy。五成熟既安格斯配红酒黑椒汁，煮得岩岩好。保留到肉汁之余又唔韧，软林林，脂肪分布平均，唔错。另外伴碟既薯片都好好食，怖满海苔粉，好似食紧紫菜味既薯片一样。虽然价钱算中上，餐厅充满情调之余，食物又高质，值回票价。