鐵路便當 (已結業)

由佢开舖以嚟都帮衬咗几次，由于座位有限，堂食只系试过一两次，其余都系外卖多。开头感觉佢哋几有热诚，食物味道同食材质素都唔差，配菜又丰富，连啲餐具同包装都有一定品质，加上好多时负责落单同收钱𠮶个瘦瘦咃嘅后生仔好好礼貌，所以次次买外卖要等好耐我都会帮衬，通常都会点返佢个猪软骨。但自从唔知几时换咗个高高哋眼细细嘅肥仔喺门口之后，成个感觉就唔同晒。我买两个便当叫饮品，佢一句dut埋嚟：「冻定热呀？下次早啲讲吖！」开头我都当佢扮友善但个格配合唔到所以效果有所偏差，咁就照帮衬算。之后有个婆婆好声好气问佢：「XX（佢外卖号码）仲未有嘅？」肥仔答佢：「未有咪未有啰！」我唔知佢系老细觉得自己生意做唔切所以可以咁对客人，抑或系伙记喺度帮自己老细赶客等自己做少啲，但系之前对呢间舖嘅良好感觉真系因为佢一个而荡然无存。