正九清湯腩 (常安樓)

营业中

休息中

喺香港要食到好食嘅牛腩，一嚟环境比较地踎，唔会专程想去食，二嚟靓嘅牛腩部位好多时一早卖晒，谂落都真系好多年冇食过真系正嘅清汤腩。 最近见朋友由澳洲返嚟，短短几日行程居然返兜咗呢间牛腩，真系忍唔住要嚟试试。夜晚7:30嚟到，只系可以拣崩沙腩，好彩我都系最想试呢个位，想试多几样真系要早啲嚟。 可以话同幻想中差唔多，就系我认知入面牛腩嘅最高境界，软腍甘香，唔会成口肥膏，牛味好浓，黐住一层爽滑嘅筋膜，咬落好舒服，唔会有兀突嘅烟靭口感。 牛肚好爽冇怪味，成个汤底好清甜有深度。上海面都有惊喜，绝对唔系扁身好腍𠮶种，反而圆圆地有弹性，有少少拉面嘅感觉。朋友加咗菜肉云吞都唔错，食得出自家制嘅味道，肉馅鲜甜弹牙，下次嚟我都会想加。腩汁萝卜大大份好抵食，有萝卜甜味，腩汁唔会太咸。