鐵路便當 (已結業)

今日去朋友屋企，一心就谂住试吓土瓜湾名物「铁路便当」听朋友讲佢成日好快就会卖晒，所以聪明嘅佢一早落咗单，我哋之后先再去攞。我哋今日叫咗三款，招牌卤肉便当，酥炸排骨便当配蜂蜜芥末，仲有红烧虎掌便当，即系红烧猪脚筋（呢个系间唔时先有）每一个便当都会配有五款配菜，佢每个星期唔同嘅配菜都可以喺佢哋嘅社交平台度睇到，今个星期有蒜泥杂菜，沙茶粉丝，辣炒鸡丁，卤蛋半只，同埋腌渍青瓜。讲返个便当先，分量大得惊人，基本上𩠌菜同埋饭嘅比例系一比一，我晏昼2点食咗𠮶个便当，到晚上七八点都未肚饿。讲返食物，酥炸排骨便当嘅猪扒好大块，基本上铺满成个便当。而且炸咗之后外脆内软，丁点油益味都冇，所以唔会觉得好油腻，而喺面加咗啲酱汁就令佢冇咁热气。至于红烧虎掌便当，猪脚筋红烧后肥瘦各半，而且好入味，而且黏性好高，感觉胶质好重，有满满嘅骨胶原，所以食咗呢个系绝对可以饱足成日。最后想讲埋每个便当都可以免费配阿萨姆红茶，茉莉绿茶或荞麦茶，或者以套餐价加配其他台式饮品。绝对系抵食之选，下次如果有机会两个人会试一份便当再加两个小食！