泰海鮮 (已結業)

对上一次入屯门三圣食海鲜已经系4、5年前既事。记得果次去街市买完海鲜，再拎去附近酒家煮，价钱一d都唔平，两个人食左千几蚊，唔平得过市区好多。今次跟系屯门长大既好朋友黎食，竟然有意外惊喜。系街市买左元贝、桶蚝同花甲，跟住去左屯门友介绍既泰海鲜煮。买左10只元贝，用蒜蓉粉丝蒸，大大只，好鲜味弹牙，粉丝索左汁好惹味。买左两细桶蚝，平时牙妈系屋企煮多数都系整姜葱煲，简单d。出街食，无理由又食返姜葱煲蚝架，就试下砵酒焗。蚝边好脆，只蚝肥嘟嘟，咬落中间多汁肉嫰，浓浓砵酒味，超好食。不过一定要趁热食，有只摆耐左先食，蚝边已经淋哂，嘥左。买左两斤花甲，好似食西餐甘，拣用白酒忌廉煮，再加乌冬。花甲好鲜甜，啖啖都有白酒味，好正。平时食西餐，通常都系比面包你索埋个汁食。原来配乌冬重好味，又饱肚d 。再叫左个芝心虾丸，一向好少食热气野，但朋友话好正，即管一试。果然系好好味。虾丸大大粒，表面包住平时食凯撒沙律上面既面包粒，咬落脆卜卜，咬到中间，虾丸弹牙爽滑，再爆出流心芝士，三重口感。热气都唔理得甘多，食左先算。今次买材料再加埋煮，每人都系$200左右，价钱平过系市区，食物新鲜美味，真系唔错。