萬丸燒肉 (已結業)

位于铜锣湾嘅日本烧肉餐厅，听店员讲本身系做高级日本单点烧肉，虽然而家亲民啲做咗放题认识，但系佢肉类嘅质素一啲都冇低到，性价比非常之高！讲下佢地主打嘅牛肉先！有安格斯封门柳、安格斯肩胛脊肉、安格斯翼板肉、美国牛仔骨、寿喜烧汁封门柳等等。个人几钟意佢嘅香葱薄牛舌同秘制牛肋条，牛舌虽然薄身，但烧完之后有入口即溶嘅感觉。牛肋条唔会食到有筋，好有咬口。其他肉类方面，日本豚五花肉、豚肩肉、美国极黑猪颈肉、豚肉眼、鸡腿肉等等，亦都有鸡皮、鸡肾串同羊腩排，除咗牛肉之外，猪肉鸡肉同羊肉都有得食，好少放题嘅会做到咁多种选择。个人最推介鸡皮同鸡肾串，平时出去居酒屋要食一串都几十蚊，而且仲可以根据返自己平时钟意嘅生熟程度去烧！除咗高质嘅肉类之外，呢度嘅小食沙律都好出色，一啲都唔马虎。海苔薯条会令人一啖接一啖咁食，唔会过咸。唐扬鸡软骨同唐扬炸一口豆腐比较香口嘅小食，唔会好油腻，份量适中。枝豆可以帮助解腻，味道适中。玉子烧偏甜，中和返烧肉嘅饱滞感。