玉子造屋 (已結業)

好想喺呢度同A姐讲声对唔住，因为我已经深深爱上咗玉子喇！我钟意玉子够百变，无论佢系咩形态，每次佢都会表现最好嘅一面俾我睇，当我锡佢嘅时候，都会感受到佢浓浓嘅玉子香味。我就最钟意佢漏晒出嚟嘅蛋汁，所以我哋被称为「漏M之恋」！而当A姐知道咗我哋嘅关系，佢不单止无嬲，仲带我去到将军澳嘅玉子造屋同佢见面！芥末八爪鱼芥末味唔攻鼻，少少辣，够晒开胃，八爪鱼份量多又有咬口。七味炸鸡翼一份有4只，鸡翼大大只，外皮脆卜卜，肉就够juicy。黑松露牛油焗菌黑松露味唔算浓，淡淡嘅黑松露，反而突显菇菌嘅鲜味。玉子咖哩吉列猪扒饭猪扒厚切，不过肉质有啲梅，而且皮唔够脆，有少少失望。不过，卖点当然系玉子啦！玉子做成旋风形状，蛋够香滑，蛋味香浓。捞埋日式咖哩汁，真系好好味。龙虾蟹肉亲子丼半只大龙虾加多只蟹钳，好满足啊！龙虾虽然唔算大只，但够晒新鲜弹牙，仲有唔少膏添。蟹钳细心帮你整烂个壳，食得好方便。仲有蟹子同洋葱炒蛋捞饭，好鲜味架。