常滿百家菜

营业中

休息中

呢间酒楼最近进行小型内部翻新，晚上主打无限时任食点心小菜或火锅放题，加$10仲包埋任饮、呢度主要用纸仔Tick食物，而自助区会提供少量热食、小食、饮品、汤、火锅料理同甜点，好适合带埋一家大细或朋友仔嚟Gathering。点心有超过20款，有部份可以一件件叫，十分贴心。全部即叫即整，上枱时热辣辣，一定要趁热食，个人最钟意虾饺皇，里面有三大粒爽口弹牙嘅虾，皮唔算好厚、鲜竹牛肉球肉嫩多汁且带点咬口、叉烧包软熟多馅、炸云吞酥脆美味、烧卖，凤爪同萝卜丝酥饼都唔错，可以试试。肉类方面有齐猪牛鸡海鲜，影响深刻嘅有菠萝咕噜肉酸甜开胃、豉汁蒸鱼云非常入味、芝士斑块肉质滑溜、菜品仲有惊喜，台式茄子、奶油扒津白、白灼菜喵，超级无敌新鲜，健康又好味。若唔够饱嘅可以叫埋炒粉面饭，有经典嘅上海粗炒、潮州蚝仔粥等，见隔篱枱有叫到，个样都唔错。最后记得要留肚食自助区嘅食物呀，老实讲虽然个摆盘唔系真系咁靓，但味道比想像中出色，尤其是系炸至外脆内嫩嘅鸡翼、热辣辣嘅姜汁蕃薯糖水同红豆沙，绝对可以当水饮、完全唔甜且Q弹嘅双皮奶，难怪每位得一份。饮品仲有玻璃瓶维他奶、可乐、大量啤酒等，真心性价比极高。