早安越南 (已結業)

屋企无煮饭，放工唯有同女友去撑台脚，上咗黄埔美食坊行咗个圈，见到早安越南一人餐几抵食，有汤檬，汤河，炒饭，炒金边粉，咖哩饭，牛腩饭，香茅猪扒饭，卤肉蛋饭等，款式又多，款款都好吸引，仲包埋特色饮品，有我最爱o既椰汁三色冰同椰汁珍多冰，就拣定入去安坐食晚饭啦。睇完Menu就拣咗两款一人餐，包括香茅猪扒汤河同越式海鲜虾膏炒饭，仲配咗一杯龙眼冰同一杯椰汁三色冰。见小食蒜香牛油鸡翼好似好吸引就叫咗一份。另外，意外发现越南餐厅有肉骨茶都叫咗一碗。肉骨茶感觉药材味较重，落足料。蒜香牛油鸡翼大只又香又好味，食完令人好满足。至于香茅猪扒汤河，河粉配浓味汤头感觉好夹好好食，汤底令人会想饮多两啖。越式海鲜虾膏炒饭就系我至爱，粒粒炒饭炒得又香又入味，虾膏咸味岩岩好引出海鲜鲜味，配合埋两杯冰饮真系天衣无缝。我特别喜爱佢地三色冰粒粒豆真系又大粒又甜好好食。食咁多野每位都系$150左右，呢个晚餐好抵食呀。