睿海御宴 (已結業)

睿海御宴 - 高級特色中菜廳 今日再有機會去到大坑依個充滿美食嘅神奇地方，之前有食過午市覺得都唔錯，就試試佢個晚市！ 充滿大坑特色嘅大門同樓梯，舒服、有空間感嘅雅座。 唔算特別大間，可以話係小店嘅感覺！螺頭瘦肉雞腳湯非常有特色，上枱係好熱，明顯係原盅燉湯，入面好足料，用茶壺倒落茶杯到，個湯出黎好清，望落真係有茶嘅感覺，但飲落去係好清甜嘅螺、雞湯味，細細杯慢慢飲，好似飲咗好多咁！成個體驗好特別，岩哂我鐘意飲中湯嘅人。XO醬和牛炒陳村粉 有人話乾炒牛河係粵菜嘅精粹，越簡單嘅嘢就越難做得好，依碟係食材上升級咗，但無忘記牛河嘅核心：有鍋氣同埋要乾身! 和牛係堅和牛，油脂足，一啲都唔韌，又當然唔係茶餐廳鬆肉粉啦。炒陳村粉難度極高，但大概都做到條條分明有上色，口感特別，同其他配料都好襯。魚湯浸豆苗簡單一個菜，但上碟個presentation做得好足，加咗木耳杞子，令人滿意、有誠意。海帶綠豆沙最後以甜品作結，綠豆沙非常足料，一啲都唔水，滿足！特別想講佢上菜啲碟真係好靚！擺盆亦做足，整體黎講，色香味俱全！好岩宴客或者要靚嘅場合！