月山

营业中

休息中

月山环境非常优雅清幽，但比起尖沙咀嘅姐妹店-日山，呢度嘅装修就比较黑。好彩职员安排咗窗口位，所以都有日光伴随呢餐佳肴。好多人都会选择食Omakase, 不过今次想庆祝一下，所以选择咗食贵少少嘅Tasting Lunch Menu，包7款精致菜式。第一道菜先有松叶蟹茶碗蒸，蒸蛋嫩滑，蛋味唔算好浓郁，配合鲜味十足嘅海鲜。第二道菜系北海道云丹金枪鱼腩杯，卖相精致，刺身鲜甜，可以配搭放系一旁装饰嘅紫苏花一齐食。第三道菜有吉列A5和牛，外脆内嫩，口感唔会好油腻，而且配搭嘅酱汁都非常特别。之后第四道菜系慢煮北海道鲍鱼，鲍鱼肉质软嫩，特别欣赏佢配合用鲍鱼内脏打成嘅酱，鲜味十足。第五道菜系煮物，职员未介绍之前以为系牛颊肉，但原来系煮得非常入味嘅金枪鱼鲛。金枪鱼肉质又软又嫩，汤汁味道香甜。最后嘅主食系海鲜丼，刺身同配料种类非常丰富，而且每款刺身都好鲜甜，饭量唔算多，但系非常满足。甜品系日式菓子，麻糬皮好烟靭，包住来自冲绳嘅菠萝，另外仲有清甜嘅蜜瓜配寒天。