天外天

今晚同友人食生日饭，一年一次当然要食好啲，拣咗呢间系Hotel Icon嘅中菜餐厅。预先有book枱坐到窗边嘅位置，可以望住个维港夜景食饭，好赏心悦目，剩系望个景都值回票值，哈哈～叫咗片皮鸭晚市套餐。前菜有：青瓜红蜇头。蜇头好爽青瓜好脆。原只鲍鱼鸡粒挞。味道估唔到咁夹，食落好有口感。五香安格斯脆腩片，好惹味，能够做到外面脆入面肉又软硬刚好，厉害！港式片皮鸭，店员会先拎未切嘅鸭比我地望，就咁睇都觉得好吸引。片出嚟都几大块，薄饼份量刚好可以一块夹一片鸭/鸭皮，夹埋青瓜京䓤食好滋味呀！食到鸭嘅油香加上爽脆嘅青瓜感觉唔肥腻，唔错！生拆蟹肉菜苗羹，清清地几鲜甜，饮落好多蟹肉。干烧明虾球，一人两粒大大粒好弹牙，就咁食会觉得好甜，但连埋个香喷喷嘅樱花虾带子蟹肉炒饭一齐食就啱啱好。芒果热情果泡芙配白朱古力忌廉，最上面果粒外面Q弹入面系芒果热情果汁好得意。两人埋单约1400蚊，有靓景又有美食真系个难忘嘅生日呀！