德美壽司

营业中

休息中

好多人，坐爆哂，好在订咗枱。间餐厅比较细，但系櫈下面有个兜装袋，好方便。叫咗5样嘢，先嚟牛油果沙律🥑。牛油果粒多，沙律菜新鲜，捞入温泉蛋，少许蛋味，多咗一啲味觉层次，有特色，好好嘅开始。跟住三文鱼茶渍饭，大大碗，饭团够实，所以都算多饭，加上舖满炸米，都几饱肚。三文鱼好似罐头𠮶啲，不过同啲汤饭一齐食，都唔错。再嚟绿茶冷面，伴有汤汁，蛋角碎，葱粒，虾片碎同生鹌鹑蛋，好特别。捞埋一齐，主要净系食得出虾片味同汤味，一啲绿茶味都食唔到。😂之后有盐烧鲭鱼🐠。都好大条鱼，烧得非常之好，从未食过咁嫩口嘅烧鲭鱼，唔系硬掘掘嘅，最紧要系腥味劲少，一流呀。跟住重头戏嚟喇，就系银雪鱼西京烧🐟。比我想像中大份，烧得肉嫩皮脆。唔多唔少嘅牛油味同糖嘅甜味，加上鱼嘅油脂，实在系极品，仲有青瓜同薯蓉沙律配衬，简直系性价比极高嘅菜式，下次一要再嚟食过。临尾送甜品奶冻。奶味好浓，但系我唔系咁钟意呢种奶味。奶冻弹性唔错，如果系其他味就好啦。今晚全部啲份量都好足，食得好饱，但系唔算好贵，好满足。