Futurus Gourmet (已結業)

上次去chicken n egg，途中发现呢间好有私房菜feel嘅野，专卖parma ham嘅，但有set dinner食，168起，感觉间野有好强嘅气，话比我听佢系好食嘅，一定要试下。然后喺超过35度嘅某一晚，由乐富站行到去佢门口，先发现我想食嘅牛扒系168+90再加一，长期粮尾黎讲，真系有啲想走，但系实在太热喇，都系入去豪多餐，结果，好彩入咗去。经过冻柜位，原来入面别有洞天，梳化位超阔落好坐。最重要系，又系包场！一个客都冇！真系瞓喺度食都得。为咗平啲，2个人嗌咗一个牛扒set加一碟鸡翼。鸡翼食落似系烤焗做法，外面金黄色一点点，味道似系咸蛋黄整出黎嘅酱咁，但又唔太咸，算烤得几好食。set dinner个汤不过不失，冇乜特别。之后上个头盘系沙乐美肠多士，就几惊喜，惊喜在旧面包好松软，配块薄薄嘅肠片系恰到好处。但最惊喜嘅都系块牛扒，餐牌写出黎好似系安格斯，以1蚊1g黎讲，佢份量真系有168+90咁大块，肉汁真系丰富，肉味真系香浓，只系落咗少少粗盐吊味，口感已经相当好。粗薯条亦都系水准之作，如果有埋啤酒送就完美喇，所以虽然间野好好坐，但食完之后都系好快埋咗单出去饮酒。