S2 Kitchen (已搬遷) 新店位置

父亲节去过S2铁板烧庆祝，最近去仲见到有海胆杯盛宴menu（二人份 $1888），有11道菜，当中不少都系以海胆入馔，非常丰富！沙律：蟹肉黑醋沙律杯（2份）有番茄、豆腐、车厘茄同埋蟹肉，不过配搭就好似各有各咁，唔算惊喜。北海道三点刺身 （2份）三款刺身包括三文鱼、甜虾及北寄贝，质素不过不失，可能系刺身雪得太冻，略为影响味道。十层海胆杯（2杯mini）记得好多年前食过S2 Kitchen嘅海胆杯，非常回味，估唔到今次喺S2铁板烧都有得encore！海胆杯整成mini版，但滋味依然。十层分别系白饭鱼脆片、黑鱼子、海胆、海葡萄、白虾、三文鱼籽、吞拿鱼蓉、蟹肉、海胆同最底嘅海带，海胆鲜甜味美，配合不同嘅食料，令味道更有层次，口感亦更加丰富!蟹粉甲罗烧海胆杯（1只）食完海胆杯意犹未尽，呢个甲罗烧就嚟得刚刚好啦。甲罗烧材料矜贵，放有大量蟹肉、三文鱼籽、黑鱼子、海葡萄，仲有慷慨嘅海胆！捞埋一齐食，可以食到唔同嘅鲜味，既有海胆嘅甜，又有鱼籽咸香，仲有海葡萄独有嘅味道，好有层次！海胆焗原条海参（二人份）非常惊喜嘅一道菜！海参口感爽滑，但本身味道较淡，秘制海胆汁令到鲜味更加突出，个汁好味到我忍不住清碟呢！