家賀屋

海胆龙珠卷喺日本Foodie page就见得多，好怀疑系咪得个样，估唔到真系食到舔舔脷。 首先海胆新鲜清甜，但重点系酱油渍蛋黄非常香浓浆口，原个啪真系好香，值得一试。黑松露烟熏帆立贝好完美，帆立贝轻轻烧过，加埋黑松露嘅香气、三文鱼籽嘅咸香，味道好丰富，重点当然系帆立贝甜味冇被盖过，各适其适。汁烧免治鸡软骨棒水准以上，鸡肉棒腍滑，蛋汁有蛋香唔会太咸。盐烧仙台熟成牛舌芯有惊喜，可以话系香港第一次食到内里仲系嫩红，唔系爽口而系爽中带腍嘅牛舌，非常高质，感觉到熟成真系重左牛味同软熟左。墨鱼刺身卷得好靓，本来怕卷大量青瓜丝会抢味，但完全冇问题，墨鱼新鲜爽弹，咬落清脆唔会粉。 三文鱼腩刺身系典型厚切嘅腩位，新鲜紧致，大大件性价比好高。令和之怪物蚝真系怪物size，差唔多有手掌咁大，入口海水味浓，蚝肉饱满爽滑。