家賀屋刺身寿司專門店

喺湾仔想食日本嘢嘅选择唔多，所以就试试呢间楼上日式餐厅。虽然地方唔算好大，但menu内嘅选择好多，刺身、寿司、炸物、烧物样样有齐！我哋叫咗几款寿司，三文鱼、油甘鱼、火炙左口鱼、芥末八爪鱼，海胆墨鱼试试佢。鱼生同饭嘅分配得好好，旧饭唔会大过鱼生，而且鲜味十足！呢间餐厅有好多款自家制嘅卷物，所以叫咗个青龙（炸虾卷）。摆盘摆得好靓呀，而且内里嘅炸虾仲新鲜滚热辣，十分香口！另外，叫咗特选鲔盛（$238），满足下想去日本食拖罗嘅渴求！当中有3款吞拿鱼，普通、中鱼腩、大鱼腩，3款嘅油脂都足够，直情可以媲美日本鱼市场嘅味道。除咗寿司之外，我哋仲拣咗西京烧三文鱼鲛（$65)，表面烧得啱啱好，入面啱啱好熟，鱼肉腍身有汁。而且味噌嘅味道唔系死咸，反而做到提鲜嘅效果!食得咁开心，而且见到有夏日限定嘅啤酒，当然要啤啤佢啦！温馨提示呢度有2款限定啤酒，冰啤同生啤，如果想啲泡有沙冰嘅感觉，可以一试冰啤，有凉透心嘅感觉！