神樂 (已結業)

平时放工同朋友约食饭都系去开尖沙咀，今次专登揾间未试过嘅餐厅食下。最近天气开始热想食啲清爽啲嘅嘢，又要决定食寿司，一去到嘅时候门口都多人，攞飞嘅时候可以留低电话到嘅时候打俾你，加分位，唔使企喺门口等，不过下次嚟我会选择卜位。一心谂住嚟食寿司所以request左要坐吧枱，对住寿司师傅十足10食omakase咁。职员好细心介绍当日有咩推介，见到餐牌价钱反而有惊喜，于是决定唔嗌餐单点晒想食嘅寿司，都唔算贵。食寿司之前点左个鸡泡鱼鱼干同炸芝士小食，两个上枱都热辣辣，炸芝士仲流心添。我哋每人前前后后点左大概11-12件寿司，一路望住寿司师傅喺我哋前面整，整完放到我哋面前即刻食，师傅都好细心，应该有留意我哋嘅进食速度去调节，所以同朋友可以边倾偈边慢慢食，有种去左日本居酒屋chill嘅感觉。全部刺身都食得出新鲜，可能客人多去货都快，当晚最出色系深海池鱼同埋中吞拿鱼腩，池鱼我同朋友都直情encore左。餐厅冇追交枱，我同朋友边饮边食坐到10:00，临走前同店员倾开，佢哋嘅午市都好抵食，下次过开嚟做嘢一于试吓。